莎莎（178）主席郭少明身兼優質旅遊服務協會主席，噚日出席活動時，慨嘆今時今日香港難請人，所以教好員工好重要，仲應該多啲𠱁人，佢自己都成日𠱁老婆㗎。
佢回憶起，當年莎莎初起步時，點樣同太太郭羅桂珍train人。佢會向同事講：「一句說話可以𠱁死人，又可以激死人，點解唔用𠱁死嗰句呢？」，所以就應該多啲𠱁客，唔好吓吓服務差、語氣差，大家都會開心啲，佢亦都成日𠱁老婆㗎，仲肉麻加多句:「老婆要用嚟𠱁吖嘛」，郭太聽到應該甜到漏。
不過都係行動最實際，之後佢同郭太一齊影合照，貪靚嘅郭太嫌胸前名牌扣得唔夠四正，「愛妻號」郭生立即識做扣番靚佢。