《仙遊首爾》嚟到第二集，動主播阿仙由首爾搭個幾鐘車，山長水遠去到位於水原嘅慶熙大學搵Oppa，呀！講清楚先，係搵港式Oppa－－排球港男陳智威，人稱陳威或Alex！
同細細粒嘅阿仙拍埋，高198cm嘅Alex就好似巨人咁，阿仙索性畀部攝影機Alex自己玩自拍，否則長期cut走Alex半個頭。Alex帶阿仙遊覽大學，話可惜嚟得唔係時候，錯過咗櫻花盛開，全校變成粉紅色嘅日子。試想像，喺櫻花樹下，展開異國戀情係幾咁浪漫嘅事，點知Alex竟然話，「我無女朋友，都係專心做運動！」
Alex喺韓國受訓嘅日子一啲都唔容易，話晒喺韓國做運動員，唔同喺香港玩業餘，朝早上堂，下晝練波，有時夜晚仲要加操！Alex話初嚟報到，試過喺運動場跑20個圈，攰到訓足12粒鐘，每項訓練例如接發球、扣球等，都係以小時計，「喺香港每次練習得兩、三個鐘，無可能每樣嘢訓練一個鐘。」
面對密集式嘅訓練，一啲都唔可以放鬆，否則後果自負，「做得唔好，表現唔好，唔夠集中，有時教練會體罰，拳打腳踢我都有見過！」Alex話冇試過畀教練拳打腳踢，只係試過扭耳仔同捱波餅。
正所謂嚴師出高徒，教練金贊浩認為Alex有潛力加入韓國國家隊，希望佢勤加訓練，尤其跳起速度同體力方面要致力改善。Alex話幾辛苦都好，未來都想喺韓國發展，做職業排球員，希望可以成功入韓籍，加入國家隊。
記者：阿仙
攝影：峰、Neo
編審：Kaman
【仙遊首爾(1)】長板女神教Seflie 衣櫃收埋幾條短褲仔？
http://bit.ly/2weAyiu