8月初炒完一期嘅版塊又炒過，內銀、內險股調整少少後，噚日又再升過一輪，國壽（2628）偷步炒業績，同樣油股都炒業績，中海油（883）一樣今個星期四出中期業績，估計有得扭虧為盈，上星期股價計，中海油現價都有成4厘息，可惜入市早咗，痴心一顆呆等一個月，上個月話要上返9蚊、10蚊，噚日到9蚊啦，近5%，10蚊相信在望。
坊間大家見到都驚驚嘅藍燈籠，不過，內銀股回吐後又再次發力，建行（939）、工行（1398）噚日都升近本月初高位，有機會上破再試新高，目標價仍未到呀，等到花兒也謝了，變成訓練耐性。
成個市大漲小回格局未變，其中近幾日國指明顯跑贏恒指，得益於堆內銀企得穩，升勢有餘未盡，加上中銀監之前公佈第二季商業銀行經營數據，商業銀行今年累計實現淨利潤按年有增長，而且增速較上季上升。咁嘅大氣候下，內銀加國指上破年內高位其實冇難度，坐定定，有錢剩。