朗尼返到愛華頓重生，喺禮拜一晚英超射破曼城大關，幫「拖肥糖」作客以1:1踢和「藍月」。朗尼呢場射入個人第200個英超入球，成為舒利亞之後嘅英超第二人（見附表），佢賽後好風騷，喺網上寸曼城球迷之餘，仲話曼聯球迷應該都好開心。
朗尼今夏返母會愛華頓，好似搵番第二春，首輪聯賽對史篤城一箭定江山，而喺周一嘅第二輪英超，佢又有入波。35分鐘，愛華頓中鋒卡維特利雲走咗去右路，傳番個波入中路，朗尼盡顯頂級門前觸覺，第一時間射破曼城大門，幫作客嘅愛華頓半場領先1:0。呢個係朗尼嘅第200個英超入球，成為史上第二人，之前係得傳奇射手舒利亞可以做到呢項成就。睇番啲數據，朗尼專揀強隊入標誌性入波，好似佢嘅第100個英超入球係喺阿仙奴身上攞到，但講到朗尼最愛嘅刷紀錄佈景板就肯定係曼城，因為朗尼嘅第50、150同埋200球都係攻破曼城。
由於朗尼之前踢過曼聯13年，又係前紅魔隊長，所以成場都被主場球迷狂噓，而朗尼入波後慶祝嗰陣，後面看台啲球迷又嬲又失望，當然係又噓又爆粗啦。朗尼賽後就將呢張相放上社交網站，留言：「見到呢啲熟悉嘅面孔真係好爽！」擺明就寸曼城班球迷。朗尼雖然離開紅魔，但心中仍有曼聯，呢次搞到曼城失分，佢賽後話：「入波嗰陣係甜美嘅一刻，我肯定曼徹斯特另一半嘅紅色都好享受呢一刻。」呢番說話喺網上𠱁到唔少魔迷開心。講到重返英格蘭國家隊嘅機會，朗尼話：「睇吓點啦，我家陣專心踢愛華頓先。我肯定嚟緊幾日會同修夫基（英軍領隊）傾吓，睇吓傾成點啦。」
「4.5億先生」半場領紅
講番場波先，曼城有今夏以4,500萬鎊（約4.5億港元）由熱刺加盟嘅右閘基爾獲加喺42同44分鐘接連攞黃牌，兩黃變一紅被逐。不過，踢少一個嘅曼城終於去到82分鐘由史達寧追平1:1完場。被問到點睇獲加張紅牌，曼城主帥哥迪奧拿就唔評論，仲話：「下一條問題，我仲想作客般尼茅夫！」