啱啱過咗嘅周日，大批市民熱辣辣上街聲援16名在囚社運人士，另一邊廂一眾高官就喺政務司司長公館，嘆冷氣、食住奶媽特首精心準備嘅齋滷味，唔講明係集思會，唔少市民仲以為佢哋趁假日開大食會聯誼，喺網上惹起唔少反響。署理行政長官張建宗噚日主持行會前，都有傳媒問到點解要喺市民上街時嘆冷氣集思喎！
暫代林鄭嘅小肥張強調集思會係一早安排，因想趁副局長加入問責團隊，同特首、司局28人作一次深入溝通喎。佢講就算開緊集思會都好關心社會發生緊咩事，「所以當日發生嘅事，我哋都密切留意。大家留意到喺嗰晚政府都有詳細回應」。大家對呢番解畫收唔收貨？
「雙學三子」因為重奪公民廣場案身陷囹圄，奶媽之前話要重開公民廣場，到底進度如何，係咪會有限度開放？鐵欄會唔會拆走？張建宗都講得好明，佢話現屆政府喺公民廣場問題上嘅傾向好明顯，重開嘅目標冇變，𠵱家問題在於點操作同管理，由於內部仲討論緊，未可以交代詳情。