呢期政壇，法律界人士個個變身紅人，其中立法會議員何君堯嘲雙學三子等被囚抗爭者相對曼德拉，「只係BB仔」，又話判刑6個月都係「好濕碎」，冷嘲熱諷惹嚟公憤，連已經放棄大律師身份嘅林作都睇唔過眼，直指何君堯「on（戇）居居」。
指頗大機會屬政治檢控
經常語不驚人誓不休嘅何君堯，日前喺電台節目質疑近因覆核刑期被判監嘅社運人士唔係「政治犯」：「社會服務令時唔係政治犯，坐6個月叫政治犯，咁你點衡量6個月、6年、60年呢？」，又話相對南非黑人民權領袖曼德拉，雙學三子只係「BB仔」，「（判刑）6個月濕碎啦，你邊係政治犯，就算係都有『大佬』同『細佬』之分」。
涼薄言論惹嚟唔少批評，連已經跳出法律界、變咗星級補習導師嘅林作都按捺不住，喺facebook發帖評論：「如果何君堯係話如果係政治檢控咁（前雙學）三子就要做（坐監）10年8載，佢就係on（戇）居居」。
若以何君堯思維，以年資計，林作喺法律界肯定係何君堯「細佬」，呢位「細佬」同「大佬」仲有另一點觀點上不同，佢信今次係「政治檢控」嘅機會「擺明頗大」，但對香港司法獨立好有信心，堅信法庭獨立，唔會理律政司覆核刑期動機，「所以係政治檢控都唔會判三子嗰種刑期啦」。唔知何君堯覺得林作呢番批評，係咪都係「濕濕碎」？
李八方