唐文龍由94年出道做歌手開始，已經因為佢外型高大靚仔，仲一身健美肌肉而擁有唔少粉絲，初出道嘅佢仲曾經同過陳奕迅、古天樂等同公司。而喺演藝路上唐文龍一開始都係拍電影為主，大大隻夠晒man嘅佢演過唔少殺手、古惑仔、警察等角色，99年加入大台後就已經直接坐上男主角之位。
要講到唐文龍嘅電視劇角色就不得不提2000年同佘詩曼、張智霖一齊擔綱嘅《十月初五的月光》，戲中初哥哥同君好兩個人之間唔少感情糾結，都係源於佢哋嘅好友金勝，而唐文龍飾演金勝喺好友、女友同家庭嘅糾纏亦非常精采。而觀眾對呢套戲嘅熱情仲促成到喺2015年拍成電影版，佘詩曼因為祝君好一角直線升做當家花旦，而張智霖首《祝君好》亦成為經典金曲。
另外2004年嘅《棟篤神探》更係當中最受歡迎嘅電視劇之一，唐文龍喺劇中飾演黃子華同蔡少芬嘅健身教練詹霑，雖然今次係做配角，但係健身房喺全劇中好多時都係交代劇情嘅關鍵場景，所以詹霑都有唔少出場機會，劇中唐文龍更加單戀蔡少芬，癡心暖男形象深入民心。
最後就真係唔可以唔提《人生馬戲團》，當年作為第一套以馬戲團特技員做題材嘅電視劇，本身已經夠吸引，但係點知劇組喺內地拍攝期間遇到驚險經歷，後來鍾嘉欣喺15年一次清談節目再次講起呢件事，原來當日係楊思琦生日，唐文龍就提議去唱k，正當一班人盡興而歸時就懷疑被「點錯相」，被一班彪形大漢手持武器追斬，全部人一齊狂奔逃避，最後鍾嘉欣話同楊思琦匿埋喺掘頭路嘅一個窿入面足足半個鐘先冇事，而唐文龍喺一次訪問中更話當時即使着住人字拖都好肯定係人生跑得最快嘅一次。