有冇發現，近期唔多見一班港區人大委員嘅影蹤，唔通約埋一齊外遊放暑假？冇錯，佢哋真係一齊外遊，但只係參加咗一年一度嘅人大武漢考察團，其中一個景點係見識第一鐵路樞紐嘅控制室，可謂悉心安排嘅行程，似乎同香港推銷緊嘅高鐵一地兩檢相呼應。
隨團嘅田北辰近日喺facebook貼相，簡介參觀三峽工程博覽館嘅情況。田二少話建造堤壩，無可避免會對航道造成影響，透露中國研發咗一個新技術，用類似升降機嘅承船廂方案，連水帶船一次過通過堤壩，只要半個鐘，就完成以前要3個鐘嘅嘢，12月會正式啟用，強調技術係世界首創。
繼而田二少就入正題嘞！佢話：「如果我哋嘅年輕人可見多啲，認識多啲，我相信會開始認同國家嘅努力，甚至可以喺當中作出貢獻」。適逢港區人大年底換屆，田二少亦係時候多啲表明心迹咯。