近排香港好唔開心，由嘉華（173）主席呂志和創辦的「呂志和獎—世界文明獎」噚日公佈第二屆得獎名單，當中有個「正能量獎」，表揚促進不同群組之間的和諧，由國際殘奧委員會奪得。
呂志和獎今年嚟到第二屆，都未有本地薑香港人得獎，唔通香港人做嘅貢獻唔夠世界性、唔夠正能量？呂志和獎獎項推薦委員會主席劉遵義話，當然唔係啦，香港人、團體，絕對有資格得獎，只不過遴選有嚴謹程序、全球提名，唔會單單對香港人有特別待遇。
呂志和獎逾千名全球提名人中，唔少來自香港，如果好快有香港人得獎，就當然高興喇。至於過往有冇、有幾多香港人或者團體曾獲提名，就唔講得。
另外兩個獎，分別係鼓勵預防氣候變化的「持續發展獎」，由發改委前副主任、中國氣候變化事務特別代表解振華獲得，表揚佢遊說同促進2015年《巴黎協定》嘅貢獻。
至於關注脫貧問題嘅「人類福祉獎」，就由提倡「耕者有其田」嘅國際非政府組織Landesa農村發展研究所獲得。每名獲獎者將會獲得現金獎2,000萬元、證書同獎座。頒獎禮將於10月3日喺香港舉行。
至於明年關注項目，分別係發展可再生能源（持續發展獎）、降低天然災害的影響（人類福祉獎）、同埋掃除文盲（正能量獎）。