【馮仁昭四圍超】Sam阿倫謀添食預埋阿Lam

【馮仁昭四圍超】
Sam阿倫謀添食預埋阿Lam

許冠傑(阿Sam)同譚詠麟(阿倫)一連12場「阿Sam&阿Tam Happy Together演唱會2017」前晚喺紅館舉行尾場,阿倫拉咗袁詠儀、戚美珍同崔嘉寶上台伴舞。
完騷後,阿Sam同阿倫接受訪問時,都話期待開part2。對於作家李碧華喺專欄建議Sam、Lam(林子祥)、Tam一齊jam,阿倫話:「嘩!咁到時咪3am?睇番公司啦,不過都可以夾㗎,因為同阿Lam都好friend。」阿Sam大爆喺演唱會嘅字幕機係為阿倫而創造,阿倫話:「其實我係特登唔記得歌詞。」

阿倫同阿Sam前晚邀戚美珍、袁詠儀等上台伴舞,苗僑偉更上台玩自拍。

「危機感唔夠」

苗僑偉兒子苗俊日前拍片將阿倫個仔譚曉風講電話放上社交網,阿倫話:「年輕人好多危機感唔夠。」問佢介唔介意?阿倫話:「第時唔好啦!」
今日係阿倫67歲生日,佢話要到外地工作唔會慶祝。至於阿Sam下個月6號69歲生日,話食牛扒慶祝:「燒牛肉,一年食一次,因為要喼弗,平時唔敢成日食。」
撰文:馮仁昭