特首林鄭月娥三令五申團隊要多落區聽民意，就連過去較少落區嘅政策局話事人，例如專責公務員事務嘅局長都唔敢怠慢呀。
羅智光（Joshua）噚日就去咗荃灣，探訪區內長者同年輕人，何解咁多區唔去揀中去荃灣？原來Joshua局長好多年前做過荃灣區助理政務專員，又住過荃灣，算係舊街坊，自言對呢區有深厚感情，落區親切到好似返咗屋企咁呀。
既然落區，梗係要拜會當區議員，之後就去長者地區中心同老人家傾偈，了解佢哋生活情況同需要，再去埋青協荃灣青年空間，同青年義工交流。佢話好喜歡同年輕人傾談，因為喺佢哋嘅面上睇到香港嘅未來。