現年37歲嘅黎諾懿入行13年，最初8年代表作欠奉，直至12年拍《愛‧回家》演馬壯成功「入屋」，轉運嘅佢連愛情運皆順風順水，14年迎娶家族坐擁5億身家、曾參選07年港姐嘅李潔瑩（Nicole），多年嚟仲被喻為「五億駙馬」，今年4月仲榮升人父。
其實，黎諾懿同當年張繼聰娶謝安琪（Kay）甚為相似，張繼聰因為事業未如老婆，形成「軟飯」形象，黎諾懿亦因為老婆屋企身家厚，被形容為「五億駙馬」，不過佢哋都有一個共通點，就係做咗爸爸之後潛力大爆發，張繼聰係大台劇接劇，仲殺埋上大銀幕。而黎諾懿亦一劇接劇，繼早前《不懂撒嬌的女人》之後，再有新劇出街，今次仲擔正做男主角。
兩位人父形象正面，廣告梗係接到手軟。不過黎諾懿係大台「親生仔」，當然有優勢，佢密密接廣告，公司就密密袋，粗略計算，單單2017年這8個月，佢已經接咗近8個廣告，仲未計平時喺出面接工作，難怪大台咁錫佢，俾晒機會上位。