啱啱過咗嘅周日，數以萬計市民喺30幾℃高溫下，頂住大太陽，汗流浹背遊行，聲援因重奪公民廣場案同反新界東北發展案而被判入獄嘅16名社運人士。原來喺另一邊廂，特首林鄭月娥就同佢嘅班子，就喺冷氣房食住滷味腦震盪。
上載fb話「大飽口福」
林鄭前晚喺facebook上載佢同一眾司局長、副局長喺政務司司長公館（即係官邸）嘅食滷味集思會相片，一眾問責官員着住慶回歸20周年嘅tee，喺公館不同角落合照。
林鄭喺帖文話，前日重返闊別7個月嘅公館，主持本屆政府第二次集思會，「食晏嗰陣我特別喺我成日幫襯嘅舖頭買咗燒味、齋滷味、豬仔包等，加上公館同事同埋禮賓府同事合力泡製嘅各式甜品，等大家腦震盪嘅同時，亦大飽口福」，仲hashtag「集思廣益」、「團隊精神」同「腦震盪」。
齋滷味到底好唔好食？睇司局長嘅笑容似乎幾滿意，但網民對此卻唔多like，正所謂識睇睇留言，唔少網民喺fb留言，「知唔知山下有多少人在咆哮」、「萬人出嚟晒（曬）住遊行表達不滿，你嘆住冷氣喺度圍威喂」、「良心犯食緊皇家飯……我係你就食吾（唔）落啦」，仲有啲留言話，原來林鄭修補社會撕裂係不回應、不表態，扮睇唔到就當作大和解嘅對策。
亦有網民戥其他司局長不值，話林鄭呢位工作狂，要下屬星期日返工：「平日大家返工唔震（腦震盪）得，要人星期日返工，有冇變態啲呀﹖」似乎說話唔可以亂講，滷味都唔可以亂食。
李八方
