中資企業舉行記者會，一向有「你懂的特別安排」，噚日中海外（688）業績會似有新突破。話說由龍湖（960）回巢、返中海外做主席兼行政總裁嘅顏建國首次坐正見傳媒，唔少香港記者都霸正中間位置想同顏總交流交流。
正當一班坐正顏建國面前嘅本港記者奮力舉手，公司完全係「睇佢唔到，睇佢哋唔到」，跟手畀內地記者連問兩題。
到咗第三條問題，更出現搞笑位，公司搵後排一位根本冇舉手提問嘅行家提問，連公司負責遞咪嘅同事都根本唔知畀邊位行家問先好。
除咗感嘆「這些機會不是我的.jpg」外，現場記者當然呆晒，仲要套一句內地潮語，真係「嚇死寶寶了」！
雖然最終顏總都有畀大家問多一條，但套佢一句中海外都在香港發展幾十年了，對香港情況十分熟悉。而且市場又對佢上場反應正面，預期積極作為，何必呢？