暑假期間，好多公司都有實習生，個別公司會畀實習生去業績會坐後排見識一下，畀實習生坐上台就真係少見。
理文造紙（2314）太子爺李文斌噚日就搵埋一位姓陳嘅實習生，坐喺佢旁邊一齊主持業績會，當對方係小助手。佢介紹呢位小助手時，仲出奇不意咁考佢，問佢啱啱記者問咗乜，好彩陳同學冇驚驚，即時反應得切，大家睇見就忍唔住笑咗。
陳同學讀緊中大工商管理，佢參加咗香港新活力青年智庫舉辦的一個暑期內地實習計劃，而呢個智庫就係由李文斌創立嘅。
李文斌會叫後生仔去佢公司做實習，唔只喺業績會做助手，仲要上內地廠房工作。陳同學亦識賣口乖，話多謝李生畀機會佢見識呀。