自從2001年由家燕媽媽主演嘅《皆大歡喜》喺夜晚播出後，呢類處境劇雖然冇一啲重點猛劇咁高收視，但係就勝在長做長有，收視穩定之餘都有一定嘅捧場客，而當中《愛‧回家》系列可以話係自《真情》以嚟最受歡迎嘅處境劇，單單第一輯就已經做足有成804集，除咗長壽之外，《愛‧回家》系列其實仲捧紅咗一班藝人。除咗黎諾懿、張達倫同埋楊卓娜之外，張振朗最近亦被大台力捧。30歲嘅張振朗，喺2011年經藝員訓練班出道，早喺2012年就已經以六個唔同嘅配角身份出現喺《愛‧回家》中，直至2014年以「宋禮勤」一角回歸《愛‧回家》，更成為單元男主角，之後戲份就越拍越多，喺第二輯《愛‧回家》中仲以男主角身份出場。