八方相當年：
陪友面試　曾健超竟變空少 - 李八方

由空中少爺到做社工，再由社工轉跑道從政，繼而因為佔中掀起波瀾，曾健超（Ken，圖）嘅人生路似乎唔太平坦，原來佢自細已經因為家庭問題，學識獨立自強。
現年42歲嘅阿Ken，父母喺佢14歲時離婚，佢同妹妹亦因此分開，中四時更搬咗去同學屋企住，嗰時已經學識要獨立。由於屋企冇乜照顧佢，佢話細個都幾曳，讀書成績只係一般，好在有返教會，令佢嘅路冇走歪，亦可能小學已經做童軍，令佢更識自力更生，亦令佢大個咗敢於接受挑戰，「攀山涉水難唔到我，bungee jump等乜都夠膽玩」。
喺香港樹仁學院讀過新聞系，其後去咗理工大學讀社工；1997年做過學聯常委，主權移交前後嘅大時代，當時一腔熱血一團火，佢話年少時已經想改變社會，曾經喺民主黨位於堅道嘅中西區辦事處做暑期工。

做外展社工靠打機執仔

點解無厘頭會做咗做空少？竟然又係嗰啲港姐陪人去面試，人哋唔得佢得咗嗰隻，阿Ken憶述當年喺新西蘭國際太平洋學院讀緊國際關係，趁假期返港陪朋友去面試，「都想睇吓個世界」，結果朋友唔得佢得咗，一做就做咗3年空少，好記得沙士期間個機艙吉晒，亦試過同內地客講英文，俾對方以普通話狂鬧。做外展社工時經常喺網吧同機舖執仔，佢話打機有一手，好多時由此同佢哋打開話匣子。