李香琴自從五年前退休後，已好少喺公眾場合露面，之前有幾次喺屋企唔小心跌倒，曾有傳85歲嘅琴姐出現腦退化症狀，而前幾日老拍檔譚炳文出席活動時，就話已有11個月冇見琴姐，當時仲嘆氣話唔知佢認唔認得人。
貪靚搽甲油
噚日黃夏蕙喺facebook貼咗張琴姐嘅近照，原來夏蕙姨同炳哥個女譚淑瑩，仲有位女友人一齊去探琴姐。相片所見，琴姐啲頭髮已經白晒，但仲好貪靚，搽咗粉紅色指甲油，拎住一隻金雞擺設，夏蕙姨留言：「我同瑩瑩一齊去探香琴姐，佢身體好番好多啦，仲認得我㖭。」相信關心琴姐嘅朋友都可以放心。
據知，夏蕙姨喺一個禮拜前同譚淑瑩去探琴姐，因為對方成日同琴姐聯絡，所以琴姐一見到譚淑瑩就認得出，至於夏蕙姨，琴姐就諗咗一下。夏蕙姨噚日接受電話訪問時話：「我講起舊事，琴姐雖然反應唔算強，但佢都答『我知，我知』，琴姐狀況好好，好精神。」夏蕙姨今年訂咗好多金雞，但之前未探過琴姐，所以特別留咗一隻送畀琴姐，佢哋逗留咗約一個鐘就走，唔想阻佢休息。
撰文：馮仁昭
