上周六德甲，漢堡靠尼古拉梅拿嘅入球，主場1:0贏奧格斯堡！不過梅拿慶祝入波嗰陣動作過大，唔小心整傷咗膝頭，賽後仲證實韌帶撕裂要唞成七個月！29歲嘅梅拿喺八分鐘入波後就沿住底線衝向角球旗慶祝，佢興奮到轉身跳起又揮拳大叫，不過佢落地嗰吓就出事喇！本來好開心嘅隊友知道唔對路，就即時叫隊醫埋嚟。最後梅拿證實右膝前十字韌帶撕裂，預計休戰七個月。