律師T透過WhatsApp召開下午茶茶會，七位老校友依時出來吹水不停，論資排輩，左丁山原來係最遲畢業嘅，成為小師弟㖭。在華商會十樓飲下午茶，認真抵食，律師T係資深會員，話呢度嘅價錢便宜過大家樂，請各校友大擦無妨，船務專家C堅持要俾錢，要律師T收下一張紅底先至離開，左丁山則素來面皮厚，有人請客，卻之不恭也。
大家相識幾十年，無事不可談，曾經得過最佳記者獎嘅傳媒M談及左丁山日前寫「沒有了任美貞」一事，詢問有無下文。好似有少少，有消息人士閱本欄後來電告知，任美貞有咁啱得咁蹺，寫完關於大酒店篇稿之後，就放長假，暫時輟筆喎。放完假又會點？且看下回分解。
今日傳媒難搵食，政治低氣壓籠罩，獨立評論員嘅自由度逐漸減少，加上為咗慳水慳力，報章水平不斷下降，更難吸引讀者，故此左丁山雖然俾幾位新聞系師兄鬧，仍然認為學生尖子入大學無謂主修新聞系，因前景實在不明也。
座中一位師兄公關P就話：「人老咗就想當年，我在新聞系畢業後第一份工就是在南華早報，人工高，有14個月糧，人人羨慕，嗰陣時做南早記者不知幾威風，我都有少少沙塵！」嗰陣時係幾時呀？公關P話：「時維1969，新亞新聞系只有九個畢業生，我攞南華早報獎學金，每年一千五百元，但中大學費只係八百元，扣完學費還有七百元去買相機，三年班暑假就俾南早召去做實習記者，月薪五百，做完就offer我一份工，四年班考完學位試就去上班，月薪一千五，計年薪仲高過做政府EO，未考試前就做兼職，係月薪五百。我可以日日坐的士返農圃道㗎。」聽吓都令左丁山羨慕，如果以此例去引伸，今日新聞系學生如果得到南早獎學金，應該係每份近乎八萬元，真係發夢冇咁早！而1969年美孚新邨百老滙街15號中層B室（實呎446）只售2.95萬元，即使在工商日報做實習生，月薪三百元也可以買到四呎半，今天之中文報館實習生，月薪買唔到美孚樓半呎。有此數據，可以推論到，上世紀60、70年代之大學畢業生，係香港戰後最幸運一代，食住經濟啱啱起飛大趨勢，正式係食住上，只要大學畢業，EQ正常，全部可以脫貧。呢一班老人家今天如果對住下一代話：「你地冇我地咁叻！」可能言過其甚。船務C正是呢個時代嘅受益人，對律政司窮追猛打青年示威者，係要佢地坐監而後快，袁國強先至感覺痛快，十分不以為然。青年人不為私利上街示威，已受法律懲罰，律政司何必係要痛打落水狗呢？