報載澳洲一名二十六歲女子，最近歐遊接二連三碰上恐襲，不論落腳倫敦或者巴塞隆拿，都與揸車撞人的司機不期而遇，口痕友得聞她出生入死有驚無險，禁不住翻翻白眼提出質問：點會咁啱線㗎，次次都不偏不倚在案發現場蹓躂，你慌唔係有份參與策劃乎？香港某位打政府工的朋友這方面成績也不弱，放假旅行頻頻和恐襲有個約會，不過他往往比借阿拉真神之名行兇的狂徒早到一步，玩完玩罷打道回府，背後才鮮血四灑，對腳頭素有研究的觀察家立即發表心得，規勸他一係每日用碌柚葉沖涼，一係咬緊牙關和異性性交轉運，可惜雙雙未被接納，繼續擔任行得快好世界的恐襲先知角色。唉，運氣呢家嘢，有就有冇就冇，成世人從來沒有中過獎的黑仔最清楚，老來漸漸睇通睇透，唯有祈禱命運之神不要表演幽默感，忽然來個一百八十度扭轉，臨尾搞出啼笑皆非的好嘅唔靈醜嘅靈。
頭頭遇着伊斯蘭國瘟神的澳洲妹堅定表示絕不龜縮，就算阿媽聲淚俱下哀求，都不會取消旅遊計劃，其烈女本色教人肅然起敬。張迷當然想起寫香港三年零八個月的《燼餘錄》：「同學裏只有炎櫻膽大，冒死上城去看電影──看的是五彩卡通──回宿舍後又獨自在樓上洗澡，流彈打碎了浴室的玻璃窗，她還在盆裏從容地潑水唱歌，舍監聽見歌聲，大大地發怒了。她的不在乎仿佛是對眾人的恐怖的一種諷嘲。」可是處變不驚有什麼問題呢，難道慌失失走避才是上策？數月前許鞍華的《明月幾時有》盛大公映，有識之士從書堆翻出這篇私人前線報導對照，徹底人比人比死人。