政府硬銷一地兩檢，當然唔只出動律政司司長袁國強、運房局局長陳帆同保安局局長李家超咁簡單，其他建制派都要出嚟搖旗吶喊。全國人大常委范徐麗泰接受《星島日報》訪問時就提到，一地兩檢歸根究柢係信任問題，「如果你係唔信，覺得內地政府隨時想破壞『一國兩制』，如果你咁樣諗，最好方法係離開香港」，更笑言「我都聽聞唔少人鍾意去台灣，覺得生活唔錯，都可以考慮」。
網民：佢個仔應該搬走
范太呢番風涼話，喺網上掀起熱論兼狂轟，有網民以佢兒子范駿華投訴鄰居隻狗好滋擾，向法庭申請禁制令為例，反諷如果以范太思維，佢個仔就應該搬走噃！
支聯會秘書李卓人亦炮轟范太非常可恥，「係咪想趕走晒香港人吖？香港係我哋嘅屋企，點解我哋要走？」，反駁指「係你哋入咗嚟破壞我哋嘅制度」，表明「我哋一定唔會走，我哋仲要趕走喺香港嘅賣港賊」。
范太到底喺訪問中點講？佢批評有人將內地執法人員「妖魔化到極致」，聲稱執法人員好明白規矩同界線，「正如香港警察過了羅湖橋，就沒有執法權力，人人都明」，當然佢嘅重點都係力撐一地兩檢對香港有好處，「香港歌星在西九文化區開演唱會，（內地人）在重慶、武漢都可以坐高鐵來港，然後留港消費」。
范太繼而講到中央唔係極力推動一地兩檢，反而係港府希望做，內地先配合，「最有利係香港，其實人哋幫緊你，對佢來講唔做冇損失，但現在幫你連接內地鐵路網，對你香港有利嘛，站在一國立場，幫吓手無所謂」。佢最後又批評泛民逢中必反，只係一味擔心，例如當初都有人擔心解放軍進駐香港喎。
識睇睇留言
Eling Chiu：根據佢嘅講法，佢個仔最好搬屋，做乜告人？
Mei Hong：講中了，好多所謂高官的仔女正在外國呀
Sonny So：我哋喺香港出世，長大，生活咗幾十年，點解要我哋離開？要離開嘅應該係共產黨。共產黨係外來勢力，鵲巢鳩佔！
溫吉：佢已經用曲線，表達自己對台灣嘅仰慕。
Edith Vong：記得當年米字旗下，佢笑瞇瞇對住英國國旗個樣，佢慣咗邊個畀着數佢就係娘啦！
Kp Chu：犯婦人又說三道四，加大力度令香港沉淪！
資料來源：《蘋果》網頁
李八方