曼聯上周六作客大炒史雲斯4:0，連續兩場聯賽大勝對手四球，加埋派咗八隻光蛋，創咗球會110年嚟最佳嘅開季成績。曼聯咁威水，香港又多魔迷，大台嘅新聞又點會唔報！不過，有網民喺周日凌晨開大台互動新聞嚟睇，竟然發現曼聯作客史雲斯場波改咗喺香港嘅青衣運動場舉行，真係笑死街坊！
網民cap圖狂抽水
話說周日凌晨大台報曼聯賽果嗰陣，自然要去片，但可能導演出錯啦，竟然出咗上周六晚曼聯U16喺青衣運動場同香港U17友賽嘅片段。呢單烏龍嘢咁搞笑，點會冇俾人發現！fb專頁「香港人Secrets」分享咗呢段片，唔夠半日已經有超過2,000人like咗。有網民就留言諷刺，好似網民Fish Lo就話：「讀稿機器，見到咁樣都唔知出事！」網民Ka Chun Wong就咁講：「史雲斯個主場咁熟嘅……」唔少人諗起王晶嘅經典電影《賭俠1999》，其中網民Edison Fong話：「播番四年前慶祝嘅畫面。」
我求大俠之後問過前大台體育主播馮堅成，佢話直播新聞去錯片時有發生。堅成話：「其實，喺直播嘅新聞節目入面，去錯片係好平常。據我了解有三架機放咗幾條片喺度，只要導演撳錯咗其中一條，就會去錯咗。三條片只係見到個片頭，所以有時出錯，我做嗰陣都試過。」不過，堅成話做主播嘅應該醒目啲，「讀嗰陣要留意吓，有時見到唔對路就要停，唔好一路照讀。喺嗰段片入面，見到個主播讀完之後都愕一愕然，佢應該都知道有啲唔妥，同埋佢應該要講一句『唔好意思，因為技術問題去錯片』。」
傳伊巴下月回歸
講番曼聯嘅消息，領隊摩連奴賽後風騷咁話：「如果你們有留意我喺場邊嘅身體語言，可以睇到我覺得球隊已經控制比賽。」另外，英國傳媒又話曼聯會簽番伊巴謙莫域，仲講到最快會喺下個月傾掂。
