香港50、60年代急速發展基建，為咗鞏固斜坡，政府大量種植外來嘅台灣相思樹，但相思樹平均壽命得50、60年，早年種植嘅相思相繼步入老年期，有毛病甚至倒塌。路政署去年4月推出斜坡植林優化計劃，喺11個試點移除健康欠佳嘅台灣相思，再重新種番朴樹、羊蹄甲樹等原生同本地化植物。
相思樹完成喺路旁嘅歷史任務後，旋即被賦予新生命，皆因路政署會將部份木材畀學校作教育用途，浸大視覺藝術院藝術工作室技術員及指導員凌展騰接受政府新聞網訪問話，相思樹木材軟硬適中，適合製作家具或雕塑，同時仲可以用喺職業訓練班嘅鏈鋸訓練，或作為種植靈芝等可食用或藥用菇類嘅原材料。