親生仔不如近身錢！
上星期講老陳「買」滙豐退休保險；這個「買」字應該合用，徹頭徹尾是一項投資產品，不是某大機構為員工退休得到保障而設立的計劃，也不是政府為巿民提供某些儲蓄保險，帶福利成份。
滙豐銀行推出這個退休投資產品，適合為日後退休得到保障，手頭上又有一筆無特別動向或投資方向的現金，至適合非積極投資博取暴利一族。至緊要資金保值，不讓貶值，到有需要時可「自由調動」。
這「自由調動」四字非常關鍵，就是祈求投資至低風險人仕，大概都不會高興資金被鎖、被監禁。就是買風險至低的基金產品，可自由於適當時候贖回。內地買一個月定期存款產品，近期回報不錯，四厘左右；三年、一年、半年，甚至三個月以上現金不調動，利息回報更高；期限靈活，如不計較利息損失，急用取回，亦可。
是老陳投資白癡？還是買退休保險時未被勸喻：這筆現金進入豪門深似海，自此賣身三年加八年共十一年（肉金並非賣身同時可得，就算葬父也需等三年之後，始得第一筆款項……未夠買棺材，先買草蓆、金銀衣紙！）
老陳有一個近親陳姑，十多歲《工廠妹萬歲》時代投身社會，清心寡慾，花費以捧寶珠姐為主，從油麻地戲院捧到文化中心之外，血汗辛苦錢支付家庭幫助弟妹之餘也薄有積蓄，心中一直有個願望：幫助姪孫第一桶金上車，買個縱使天水圍也是自己的家計劃。聽老陳為這項滙豐退休保險呻到公園棵樹啲樹葉都落晒，邊聽邊驚：死咯，自己都係聽銀行理財主任勸，買咗嗰個話會保本嘅退休保險，一樣係買咗三年足。去年想提出來交俾姪孫上會，點知話未到三年期，冇得攞。更被提議拿屋契來抵押，向滙豐借錢……
陳姑當時聽完幾乎未被氣上心頭中風：「吓，我真金白銀放入銀行為保本買個保險。不放上大陸生息因為自己香港人、信滙豐，點知急用，不計較幾年利息損失，你地叫我拎張屋契做抵押？教我借錢？仲要食埋啲利息？我陳姑捱死一世，就係為咗經濟獨立，不求人，不借錢；為買退休保險，調返轉頭要向滙豐借錢？」
以為等三年到期，全數取回交給姪孫，如今聽老陳幾乎老淚縱橫哭訴，自己嚇一大跳，即刻去銀行了解情況。途中天口熱之外，心跳加速令大汗、細汗、冷汗重叠，只怕眼前一黑，不用享用退休保險，當場仆街死！