美食博覽大家平時淨係識去一樓同三樓搵食，五樓貿易館畀業界做生意，其實裏面收埋唔少好嘢。今日大家mark實貿易館！事關前兩日淨係畀業界參觀，今日終於到普羅大眾都入到去食好西。
即燒魚乾juicy 抹茶醬油免費試
食好西又點少得東瀛美食，日本INIC coffee營業代表杉本幸二話以往喺日本都有唔少香港客仔，佢覺得香港人對美食好有sense，所以嚟香港拓展國際市場。佢哋今次有20款咖啡粉及朱古力粉，其中咖啡用低溫處理keep住浸香味，另外又有無咖啡因咖啡發售，一包30蚊，仲有165蚊樽裝任君選擇。
另一檔三重縣伊勢志摩山藤就連續第2年參展，賣燒魚乾，今次有8種口味，可以搣開即食。創辦人山本藤正話最受歡迎係鯖魚，入口都幾juicy，日本賣370円一包，香港個價呢，山本san就唔肯講啦，賣個關子先，等有興趣嘅市民親自去會場問價啦！
記得咪漏咗福岡五嶋醬油嗰支全新抹茶醬油，專為香港人而設，可以點豆腐、魚生或雞肉食，不過美食博覽會期淨係做批發，有興趣市民記得今日到場免費試味。