今日香港無論幾荒謬嘅事都可以發生，例如特區政府同你講，奧林匹克運動會只係舉辦2008年北京嗰屆，你信唔信？是咁的，銅鑼灣奧運橋嘅樓梯向來都印咗歷屆奧運會嘅年份同舉辦地方，但有網民登咗張相，見到樓梯只係寫住「北京 2008 Beijing」，隨即惹起眾怒。好彩灣仔區議員楊雪盈幫大家解開謎底。
楊雪盈噚日喺fb話，唔少居民都發現奧運橋有古怪，樓梯只係印咗2008年京奧同2012年倫敦奧運，所以佢就向民政總署工程組查詢。據署方所講，原來係重新幫奧運橋髹油嘅工作未完成，早前承辦商試髹嘅時候，發現字體唔啱，所以暫時得幾級樓梯有髹到。署方仲話成個工程大約下月至10月就搞掂喇。