譚芷昀（Celine）早前就同埋爸爸譚順生出發去到美國參加《全美一叮》，喺香港時間下星期三（8月23日）節目就會直播半準決賽，最近Celine喺美國每日都有練歌，跳舞做運動，仲有綵排同拍攝花絮。
今次嘅半準決賽分開三集，一星期一集，每集有12個參賽者表演，當中有7個人晉級，喺啱啱播咗嗰集，被喻為Celine嘅對手10 歲「小Whitney Houston（小雲妮）」Angelica Hale，同埋用腹語唱歌嘅Darci Lynne已經出場，都打入咗下一輪賽事。而喺Celine出場嗰集，都有唔少強勁嘅對手，好似有 13 歲美少女Evie Clair、16 歲孖仔唱跳組合Mirror Image、29 歲的聽障創作歌手Mandy Harvey，以及傳奇黑人Johnny Manuel等等。