香港玩具業開山祖師、亦係人氣小黃鴨之父嘅林亮，噚日喺老婆、兒子林健鋒、孫仔林凱章同大班友好陪同下，出席新書《香港玩具人》發佈會，原本林亮有請埋基本法委員會副主任梁愛詩出席，但詩姑臨時有事嚟唔到，林亮都同在場記者講唔好意思。
「出殯抬一次賺兩元」
講番本書，出生基層家庭嘅林亮，後生原來去過棺材舖打工，更曾經瞓棺材！林亮活動後同八方憶述，當年日本侵華逃難來港，因為無處棲身，所以1946年去咗鄉親喺銅鑼灣怡和街嘅棺材舖打工，「如果有人出殯，就要去抬棺材，兩元一次賺兩元」。
今年93歲仍相當精靈嘅林亮又話，自己後生貪方便唔想「朝桁晚拆」（即夜晚將床鋪架設，早上拆掉），所以就瞓棺材，「棺材舖賣嗰啲全部都係新棺材嚟，唔係舊㗎嘛，怕乜嘢啫！」仲話自己百無禁忌，「我乜嘢都唔怕！」林亮自爆之前仲試過喺一間更簡陋嘅棺材舖打工，由於舖頭只係鐵皮屋，試過因為落大雨，佢為免瞓覺被淋親，瞓棺材時仲冚埋個蓋，只留罅仔用嚟唞氣！
林亮捱完棺材舖後，去咗中區搵到一份賣雜誌工作，睇到唔少關於製造塑膠同玩具知識的書，之後就轉行做經紀人，1946年賺到第一桶金，1947年再入行做玩具，成為全中國第一個製造塑膠模型的人，其後更成為「中國變形金剛之父」。