中國鬼節盂蘭節好快到，過去兩年搞過「盂蘭文化節」嘅香港潮屬社團總會，噚日宣佈下個月1至3日，早上10時至晚上8時，再喺維園1號足球場舉辦第3屆，屆時每日都會派發1,000包各180克的金冠絲苗平安米，由於相信屆時好多人搶米，所以計劃每小時限量派100包，派完就要再等下個鐘。
增慶回歸「祈福香港」環節
總會為慶祝香港回歸廿周年，又突然喺今年盂蘭節活動，加設咗個叫「祈福香港」的環節，畀巿民喺用「天地父母」概念建成嘅「天地許願區」祈福，亦會繼續舉行親子盆供堆叠賽，等班父母可以同仔女一齊鬥快叠高祭品，叠得最快最高就有獎品。
噚日現身撐場嘅潮州鄉里、旅遊界議員姚思榮就話，細細個已睇人慶祝盂蘭節，發現現時有啲區嘅盂蘭節規模越嚟越細，原因係參加嘅人越嚟越少，所以好擔心盂籣節傳承出現問題，希望藉住今次活動保住盂蘭節文化，未來更推廣成為有香港地方特色嘅盛事。
姚思榮又預告，已邀請清一色建制派議員為盂蘭節「贈興」，包括同屬潮州人嘅兩名民記議員柯創盛同陳恒鑌，以及漁農界何俊賢、工聯會陸頌雄、金融界陳振英同體育、演藝、文化及出版界馬逢國共6人，齊齊參加搶孤（即傳統搶孤魂祭品）比賽，「希望可以增加盂蘭節娛樂性」，姚思榮仲笑言：「搵埋阿Ann姐（元秋）都好喎！」若然成事，相信今年盂蘭節大家會好開心。
李八方