廣東歌唱出唔少港人回憶，陪伴多代港人成長。唔講唔知，港台1978年推出全港首個以歌曲為本嘅年度盛事《十大中文金曲》即將踏入40周年，為咗支持廣東歌，時代廣場今日起舉辦「聽廣係好嘢」展覽，展出過百張香港60至00年代嘅黑膠唱片、CD、卡式機等，同時展覽一部份為香港電台「金曲40我和你」，展出多年嚟嘅珍貴相片、場刊、獎座等畀公眾欣賞。
港台中文台台長曾婉明同八方講，《十大中文金曲》係港台品牌節目，多年嚟受到樂壇和華人社會重視，仲係唔少港人嘅集體回憶。今次展出嘅相非常珍貴，例如有第一屆《十大》大合照，「第一屆仲未有電視廣播，視像上嘅片段唔係好多」。另外，廣東歌黑膠唱片收藏家章襄義今次亦借出100張70至90年代黑膠唱片，而網上字體「勁揪體」主事人Kit Man同當代青年書藝家青山不墨仲會以書法演繹多首廣東歌歌詞，鍾意廣東歌嘅樂迷就唔好錯過啦！
「聽廣係好嘢」展覽詳情
日期：8月18日至9月10日
時間：上午10時至晚上10時
地點：銅鑼灣時代廣場地面
展覽內容：100張黑膠唱片、卡式機、CD機、
港台《十大中文金曲》40周年相片、影片、獎座等
資料來源：時代廣場