目前世界局勢險惡，局部戰爭隨時一觸即發，以傳統智慧猜度，美國經濟利益遍佈全球，點都唔會主動挑起核子戰嘅啫，何況總統特朗普本人仲係一個商家，家財億萬美元以上，一世人計數都係講究賺錢為先，那會自毀長城？之不過，歷史上美國本土及領土從未受戰火摧殘，日本估計錯誤，偷襲珍珠港，就激起美國參與太平洋戰事，最後以原子彈痛擊廣島長崎，令日本人跪低。以此推論，假若豬年小子金正恩蠢過隻豬，妄自逞強，係要用導彈攻擊美國領土如關島嘅話，美國連消帶打，以密集導彈還擊平壤，將北韓夷為平地，一啲都唔奇。殃及嘅池魚，當然係南韓與日本啦，到時中國應該袖手旁觀，唔好為金正恩出頭嘞。但萬一中共黨內啲鷹派沉不住氣，再來一次「抗美援朝」嘅話，咁就世界大亂，香港一齊跌落火坑。
拜神保祐金正恩只係吹吓水，唔好亂嚟呀，若有新一輪韓戰，美國肯定唔會出陸軍，只會用導彈、轟炸機連珠砲發，密集攻擊平壤，北韓與美國鬥多導彈？輸足九條街啦，美國或者會損失咗關島甚至夏威夷嘅人命，但北韓將會滅亡，成為爛攤子，難民大量流向中國東北或南下衝過三八線，南韓亦會散晒。
中國目前經濟勢頭大好，GDP總值全球第二，科技產業方興未艾，共產黨掌權六十八年以來，未試過咁威風，難道習近平甘心為咗一個癲仔金正恩而與美國捲入戰爭？中共政治局常委若真正係唯物思想，真正使用唯物辯證法，相信已在背後極力勸阻金仔唔好發癲，如果勸唔嚟，如真以中國及中共利益為重，就應隔岸觀火，任由金仔滅亡，事後由「大韓民國」統一朝鮮半島，南北韓合而為一，中國與統一韓國做生意買賣反為更加有經濟實利。中國今時今日，一啲都唔想打仗，中國與印度軍隊在不丹邊境洞廊地區對峙，中國猛叫印軍撤退，印度玩軟皮蛇，一於唔走，當聽唔到，中國會唔會真係出兵趕印軍返歸呢？唔多似啫，於是形成膠着狀態，1950年中國參與韓戰，1962年有中印邊境戰，1979年有中越，當時中國還一窮二白，經濟未真正開始發展，但現在中國人身光頸靚，物質富饒，解放軍上層賣官便可斂財億萬，點會儍到去打仗呀，人地又冇打過嚟㖭！左丁山於是儍儍地推論，即使金仔大戰特朗普，只要中國保持中立，香港無憂！