「個市癲咗呀！」十年前的今日，2007年8月17日當日港股一戰，全港股民共同「見證」大時代，經歷如假包換的「大奇蹟日」！
想當日恒指高開88點後，各路人馬滿以為港股可以承接美股升勢，不過歡樂時光過得特別快，升幅2分鐘後就講拜拜。恒指掉頭向下，其後日本股市越跌越多，港股就被越劈越狠，半日收跌近700點。食晏時段，人人憂心忡忡，三魂失七魄！
當時《蘋果》證券行直擊報道，「個個客睇住日股倒水咁跌， YEN（日圓）又係咁升，都知道午後大鑊，個個好似即將行刑。」「股災、牛市已死、世界末日」之聲響遍證券行。果然午後的港股，才是當日主菜！恒指午後「加料」，竟10分鐘內再瀉600點，即較前一日瀉近1300點，港股屍骸遍野，連牛熊線都一舉插穿，全日最低位19363點。
不過，稱得上「大奇蹟日」，當日港股走過地獄後，當然折返人間！歐資大戶低位喪撈平貨，期指大戶見位乘勢追入，尾市期指差點完全重拾失地，帶動恒指急速反彈，60分鐘上演一幕拗腰完美大翻身，低位回升逾千點，全日高低波幅超過1374點，埋單計數，最後收市僅跌285點！
回看當年今日，智易東方證券行政總裁藺常念笑看風雲，「我記得嗰一日，下晝突然大跌，跌到心寒，成個人吽咗，唔識反應變咗Zombie，點知突然3點半，個市突然強勢反彈，由Zombie變到極度亢奮。」
一提到「大奇蹟日」，豐盛金融資產管理董事黃國英就表示，「記得！點會唔記得！我當日斬一大抽嘢，換晒領展（823），14蚊買嘅；仲買咗啲新創建（659），好似12個幾。得我同我朋友兩條傻佬買，當時個市升成千點，但得659係冇彈過。」結果領展翌日大升一成後，黃國英即時食糊，跟注「港股直通車」消息換馬AH折讓股三寶，即中國鋁業（2600）、江銅（358）、大唐（991），「之後就成功過一關，都非常之唔錯。」
的確，「大奇蹟日」後，港股食住「港股直通車」消息步入大升市，恒指勢如破竹，由8月一直炒到10月底，短短兩個個月，由二萬點狂衝，成功突破三萬點，更升至近32000點！此一升浪，對藺Sir副身家而言，更是非常關鍵，「07年個升浪搵到錢，當時港交所（388）100蚊買升到300蚊呀，我因為要買樓，所以260幾賣咗。就係因為咁就買樓，於是賺到唔少呀！」