這幾天，更加確認，識睇一定睇大公報！
大公報在傳真社未發佈砵蘭街CCTV前，已經一錘定音確鑿指出，在大腿落廿口釘這種威懾方式，絕對不符內地執法風格。對付反對派，一定一定一定唔會「咁便宜佢地」！大公報輕輕鬆鬆道出最佳震懾方法，莫如翻版李波的，將反對派免通關過檢，超然於CIQ，「以自己方式返上大陸」後，慢迫慢煎，極刑由初級至終極版本，樣樣齊備，釘大髀嗎？咪玩啦咁低B！
保安局長實牙實齒指天眼並未拍到擄人錄像，看來局長也是大公報粉，一早交流晒，摸晒底，知悉內地強力部門最近並無越境job，雖然會來港收風，但肯定無出過招。局長被派了這樣的定心丸，對那廿口釘有了更明確的調查方向，這幾天，恐怕翻轉西貢，做到最盡，說不定又會俾佢找到仍然蒙面的林子健，大搖大擺在西貢某燒臘店的天眼監視下，上演自釘戲碼，一邊釘一邊錄到當事人旁白：「食燒鵝都有得揀，唔知大家想要我左髀定右髀？」噢騎呢過星爺，實笑死幾個藍絲大媽，要幫葛議員call定白車！