早前委任咗自由黨員出任副局同政助的特首林鄭月娥，噚日就10月發表嘅施政報告，諮詢自由黨立法會議員意見。自由黨黨魁鍾國斌會後表示，娥特對取消強積金對沖事在必行，已知喺民主派同勞工界支持下，夠晒票喺立法會通過，但該黨席間反映商界有唔同意見，表明難以接受政府方案。雖然同娥特就取消強積金對沖意見不合，但鍾國斌形容會上氣氛好好，覺得林鄭肯聽自由黨意見多好多，對該黨好多其他意見都好正面，包括認同喺發展不同產業上，政府需要主動啲。身兼行會成員嘅張宇人亦話，娥特同上屆特首風格唔同，對自由黨建議不嬲都好熟悉，當選後亦有同該黨核心詳談，有理由相信林鄭經濟上嘅施政，睇法都同自由黨接近喎。