唔少支持民主嘅朋友，噚日一片愁雲慘霧，但係支持建制嘅朋友，相信啱啱相反。喺宣佈3位年輕人入獄6至8個月嘅高等法院門外，就有團體用喇叭大聲播放徐小鳳嘅《喜氣洋洋》，表達其喜悅之情。有唔少網媒當時打算做現場直播，諗住透過facebook直播力撐黃之鋒、周永康、羅冠聰嘅人有乜嘢講，點知大部份時間都只係聽到小鳳姐嘅歌聲，「齊高歌……」無限loop。
邊個團體咁夠薑打對台？咪就係保衛香港運動，佢哋叫其他人唔好挑釁佢哋，又話歡迎其他人士影佢哋相，然後放上fb。相當意氣風發嘅保衛香港運動發起人傅振中話，佢哋相當和平喺示威區示威，佢喺接受TVB訪問時就話，對於3人嘅刑期咁短感到好失望，因為3位年輕人係發起人，應該重判佢哋先啱。