禮拜三，薄暮，余偕內子、意志兄、香港林三人，閒步西營盤。過第二街，偶睹一店，門面漆紅，色淡，有滄桑感，上書「乒乓城」，其下題字兩行：「專業教授乒乓球 零售乒乓球用品」。西環地膽意志兄指之，笑曰：「你哋知唔知呢間咩嚟？」乒乓城，當然打乒乓波啦。意志兄耍手擰頭曰：「錯喇，呢間表面上係乒乓球室，實際上係bar。舊年日本女性雜誌《anan》有個香港旅遊專題，搵佐佐木希嚟介紹呢間嘢，大家有冇興趣落去飲返杯？」其時日落崦嵫，晦明相交，正宜淺斟低唱，醉醒參半，乃啟門而入，只見樓梯盡頭，暗藏洞天，又有廚房香味，遠來撲鼻。呢度不單樓底高，兼且格局奇：唐樓水泥牆，飾以現代西洋畫，吧枱上方中央，則掛「鍛鍊身體」四字霓虹燈，失驚無神之餘，又不失天衣無縫，奇bar也！此處飲品，主打顫湯力，即Gin & Tonic，我於是點了帶西柚香的London Dry，香港林叫Xoriguer Gin，而內子則飲啤酒。意志兄恐不勝酒力，但以果汁消渴而已，他雖不飲酒，亦可叫做酒友，何則？蓋飲酒之樂，既不在飲，復不在酒，而在人，恰如程普與周公瑾交，自言如飲醇醪，不覺自醉，意志兄出語自妙，談興亦高，固宜為糟丘之良伴也。記得他說：「呢間bar最得意嘅地方，在於佢好似乜都係，但又乜都唔係。西班牙老闆保留咗舊香港情懷，又混合現代西方格調，賣酒又賣西班牙菜，都唔知算餐廳定酒吧。你睇個杯墊，中文名寫『乒乓冰室』，外文就叫Ping Pong 129 Gintonería，而事實上佢唔係冰室，又唔單止係Gintonería，更加唔係打乒乓波，呢種咁嘅風格，令我諗起以前嘅三及第文體。」我實在不能同意更多。這兒的舊香港氣息，非真正舊香港，而是洋人眼中exotic的香港，然而這個由鬼佬詮釋的後現代香港，不正是近百年的真香港嗎？於此九唔搭八之bar，晤三唔識七之友，恣唔三唔四之談，唯以此不倫不類之文記之。