數今夏轉會窗最失敗嘅球隊，相信巴塞隆拿就算唔當選，都可以入圍最後五強。巴塞買人唔順利，家陣被人撳住搶，同埋陣中最重要、嚟緊呢兩三年就會上位擔大旗嘅尼馬都要走埋。尼馬走，意味住巴塞送走咗未來。
雖然美斯（圖）同基斯坦奴朗拿度仲稱霸球壇，但佢兩個已經三字頭，究竟邊個90後可以喺佢哋兩個退落嚟之後接班？尼馬係公認嘅人選。作為現今球壇第三人、未來球壇第一人，尼馬走人，等於巴塞將未來幾年嘅第一球星送走。可能有啲美斯迷會覺得尼馬走咗唔緊要，仲有美斯喺度。不過，由上季表現睇，尼馬對於巴塞嘅作用更大同埋更難以取代，甚至緊要過美斯。可能因為年紀開始大，美斯已經唔會好似以前咁段段爆，一個扭N個咁突破，呢項工作交由更後生嘅尼馬負責；尼馬上季西甲場均突破5.6次而美斯就3.7次。尼馬係巴塞上季最強嘅尖刀，好多時靠佢喺左路突破，殺出血路。冇咗尼馬，相信呢季巴塞嘅進攻會冇咁立體，同埋老鼠拉龜。因為美斯同蘇亞雷斯活動範圍隨年紀下降，佢兩位踢開中路，變成巴塞成堆人塞死晒喺中路，邊路冇人突破。
喺呢種情況下，美斯冇得再踢「養生足球」，要好似後生嗰陣咁段段爆，幫巴塞撕破對手防線。體能向來唔係美斯嘅強項，如果要30歲嘅美斯好似25歲嘅尼馬咁場場狂突破的話，當然以佢球技係做得到，但成季流流長，一周雙賽，美斯嘅體能頂唔頂順呢？同埋小弟最擔心嘅係，冇咗個肯跑又肯爆嘅最佳助手，美斯今季捱到殘咗，出年夏天就好難喺世盃有所作為。
文：咖喱