「潮人」沈嘉偉旗下I.T（999），事隔四年又再同有「老佛爺」之稱嘅法國老牌高檔百貨集團 Galeries Lafayette（ GL）有新計劃，雙方合組嘅巴黎老佛爺百貨（中國）會勇闖上海再開第二間分店。
唔知大家記唔記得，其實老佛爺早於1997年已經喺北京王府井開過舖，不過同唔少外資一樣，水土不服，最終經營不善而低調關店。之後2007年又因為I.T擴張太快，兼遇到金融海嘯，最終都係擱置計劃，最後係2013年內地打貪打得好勁時，先喺北京開成第一間合作百貨店。
今次雙方再次孖住闖上海，就決定落腳喺A股陸家嘴旗下浦東陸家嘴中心，但就唔使加注，由陸家嘴協助老佛爺中國進行百貨店嘅裝修，其他開支先由老佛爺中國以內部資源撥付，新店計劃將會係2019年2月底止財年下半年度開幕。
李華華