上季英超最常見字樣，可能係「Wenger out」（雲格下台），搞笑嘅係無論阿仙奴嘅比賽，甚至唔係阿仙奴比賽，遠到澳職比賽都見到呢啲橫額，連香港主辦嘅英超亞洲盃，阿仙奴冇份角逐，都有球迷帶呢啲字樣入場。但隨住上季拎到英足盃，新一季開始都唔錯，先贏車仔拎社區盾，聯賽首戰都險勝李城，叫雲格下台嘅聲音，暫時細咗好多。
𠵱家喺西班牙，特別係巴塞隆拿，最常見字樣或者係「BartomeuDimiteYa」，Bartomeu係巴塞主席巴杜美（圖），DimiteYa就係西班牙文下台意思；巴杜美2014年接任巴塞主席，都叫贏過兩屆西甲同一屆歐聯等榮譽，點解𠵱家成為巴塞球迷眼中嘅過街老鼠？作為一間世界級大球會領袖，有冇遠見好緊要，巴杜美其中一個被批鬥原因，就係同前主席羅素爾一樣，手腳唔乾淨，好似之前就有傳媒爆料，指巴塞有高層參與下，將會員冇要到嘅主場門票，拎去黑市放售圖利，講真呢啲過水濕腳，比起皇馬主席佩雷斯，用自己建築公司參與晒皇馬啲球場工程，呢筆數只不過係小巫見大巫，只要有成績，球迷都可以忍。但最衰係球會走下坡，連過去華麗風格都冇埋。
巴杜美同佢轄下嘅管理層負責球員賣買，但𠵱家只識咬老本，繼續消耗埋美斯同蘇亞雷斯剩餘能力，佢哋都三字頭，但會方都冇好好尋求接班。同時無視老化問題，漠視巴塞青訓，啱啱用4,000萬歐元買荷西保連奴，佢本身已29歲，對活化中場冇咩幫助，最傷球迷心係因為買咗保連奴，想放走青訓產品沙治羅拔圖，睇吓近年賣走堤亞高艾簡達拿、馬斯巴查等都成材，巴塞白白浪費重建嘅棋子。
文：牽牛