名校拔萃女書院十優生除咗港姐麥明詩，今後大家可以討論埋財經事務及庫務局政治助理楊寶蓮（Pauline）。月薪8.3萬、噚日上任嘅Pauline首度同財庫局局長劉怡翔見傳媒，化晒妝、腳踏高踭鞋、着得靚靚嘅Pauline自稱係「政治素人」，八方反而諗起2003年Pauline放榜日嘅「狀元素顏」清純look，唔知14年前嘅素顏同今日嘅素人，有冇大分別？
女拔生Pauline係2003年唯一一位文科十優狀元，當時受訪透露苦學普通話。
劉怡翔大讚辯論高才
現年31歲嘅佢自我介紹時話呀，自小參加辯論比賽，接觸唔少社會議題，大學時讀公共政策和國際關係，並曾從事金融工作；劉怡翔則大讚Pauline語言天份高，係「辯論高才」，相信日後工作得心應手。
Pauline曾經喺前特首董建華創立嘅團結香港基金工作，被問到係咪老董引薦？劉話睇過Pauline同副局長、自由黨陳浩濂嘅履歷，認為係適合人選，「你所講嘅團體（團結香港基金），係唔關事，係我哋自己直接去搵」。咦，劉怡翔太太係女拔校長劉靳麗娟，冇理由係太太引薦呢位傑出校友啩？
Pauline同陳浩濂月薪分別係8萬同23萬，但財庫局都仲未夠人手，因為該局近日以月薪逾11萬招聘「高級稅務研究員」， 其中職責係研究稅務措施、優惠及相關法例銜接，似乎要幫手拆掂林鄭提出兩級制利得稅、提供額外稅務扣減嘅政綱承諾喎！
李八方