我地班長者閒人，在喜萬年食乳豬，蟹肉冬瓜蓉之餘，聽投資W之保時捷歐洲自駕遊，以及啲太太到倫敦Bond Street購物之樂，法國H話：「下次飯局唔駛預我，到時我會在倫敦。」倫敦吸引力大到無窮，雖則話英國脫歐在即，世界性大銀行已紛紛開始執行Plan B，派遣倫敦員工去巴黎，法蘭克福或都柏林上班，但各國遊客到歐洲旅行，豈能不到倫敦一行？香港人特別喜歡㖭啦。譬如肥仔K嘅表弟學生豪剛收到帝國學院Imperial College嘅通知，九月中就會入學讀碩士（可持續能源工程），肥仔K話以後多咗一個理由重遊舊地，十三年前佢到SOAS讀碩士，舉目無親友，一切靠自己摸索，今次有藉口去倫敦做學生豪嘅盲公竹也。
香港家長好怕仔女輸在起跑線，其實學生豪就係一個反面例子。佢出世到兩歲都不能言語，一度以為佢有先天性缺陷㖭，細路仔時頑皮不堪，專門搗蛋，因阿哥入咗某小學，派位有分加，先至入到阿哥間小學，但升唔番本是一條龍嘅中學，到中三仲未可以寫到一篇一百字嘅中文作文或五十字英文作文，父母已經冇晒符，點知佢上咗中四就發揮潛質，考文憑試過到關，以最低入學要求，入咗中文大學工程學院，現在居然以好成績畢業，得到世界級（英國金牌大學之一）嘅帝國學院取錄讀碩士，成個「巴基之星」咁款，輸在起跑線，但終點前可以突圍而出，令全家跌晒眼鏡。所以話呢，一啲BB兩個月大就話報讀著名幼稚園，八個月大就話模擬上課，過咗一歲就話申請入加拿大國際學校，父母因住緊張過度呀！投資W話齋，有啲兒童未夠五歲就要睇精神科，成世人點搞？投資W話佢有位世姪係精神科專家，每年收入多過陳德霖，病人年齡階層廣闊，近三年特多內地富翁家庭光顧，可見今天不知何故，精神病患者急增，我地實在不要自製緊張、煩惱，順其自然就最好！
左丁山知道學生豪到Imperial，想話叫佢轉讀機械人（Robotics）設計工程，因為全世界都講緊呢樣嘢，亞馬遜、馬雲都開辦無人超市，將來富士康在威斯康辛州設廠都係多用機械人嘅啫，JP摩根已試驗用機械人做trading，彭博用機械人寫業績新聞稿，做機械人設計，唔慌冇工做啩？但學生豪雖然參加過大學機械人比賽，仲攞到獎，但興趣仍在能源工程方面，唉吔，香港只得兩個大僱主（港燈、中電）啫噃！不過肥仔K講：「科大校長陳繁昌講學生入大學揀科要注意chase your passion, not your pension，你唔好阻頭阻勢，阻住學生豪追求興趣！」諗落又係，好似吳嵩咁，30年前如果只講pension，點會棄會計師而轉行做評馬人噃，賽馬先至係佢人生最大passion吖嘛！