勞福局局長羅致光（CK）最新支持度淨值急瀉，但CK一啲都唔介意，仲好似嫌跌得少，佢噚日同八方講笑話，最好一次過跌多啲，見咗底就有升冇跌啦，唔通博谷底反彈？
CK嘅上一手、現任政務司司長張建宗有標準長工時局長之稱，有返工冇放工，CK就一改作風，最遲6點幾就收工返屋企食飯，更謝絕出席唔少剪綵活動，佢話自己唔放工，下屬可能唔敢走，認真體貼。佢準時放工都冇偷懶㗎，返到屋企會繼續處理公務，得閒就睇吓電視，前排大台套《射鵰英雄傳》佢都有睇，仲讚選角合適，但佢最like始終係米雪扮演嘅俏黃蓉。
CK話已定好未來3年工作目標，今年內除咗推出取消強積金對沖方案，仲會完成低收入在職家庭津貼嘅檢討。