英國太古集團屹立過百年，管理層一向出名長情，大部份由低做起，一做幾十年。話說國泰（293）主席史樂山年屆61歲，滿頭銀髮，為太古集團工作37年，噚日業績會被問到幾時搵接班人，佢笑笑口話未有諗法。
史樂山會後仲話，太古集團退休年齡改高咗，𠵱家可以60歲先退休，咁佢咪即係符合資格囉？佢隨即話，主席可以暫時豁免，不過暫時都未諗接班人。
其實，國泰家陣想扭轉困局，搞緊3年轉型計劃，大家都關注史樂山會唔會睇住轉型完成先退任？而佢嘅答法都好「太古」，話即使換人上場，計劃亦會繼續執行，睇嚟好有信心。
至於之前建滔化工（148）主席張國榮話有意接手國泰，史樂山就喺會上明確表示，雙方並無接觸，同時斬釘截鐵咁話，太古無打算出售持股。照咁講，張國榮嘅國泰夢咪碎了囉。
李華華