紅軍球迷仲擔心菲臘比古天奴去留？唔使驚，利物浦人才濟濟，周二歐聯附加賽首回合作客德甲嘅賀芬咸，18歲新晉右閘阿歷山大阿諾特（Trent Alexander-Arnold）都識入靚罰球，幫紅軍終以2:1贏波，下周三次回合仲有主場之利，打入分組賽應該冇乜問題。
紅軍領隊高路普之前教多蒙特，今次帶隊重返德國，都唔係一帆風順；12分鐘紅軍被罰12碼，好彩主隊前鋒卡拉馬歷軟弱無力嘅射門，俾利物浦門將米洛列特救出。紅軍大難不死果然有後福，代替因傷缺陣嘅尼達利基尼，擔任正選右閘嘅阿諾特，35分鐘主射罰球，彎過人牆直飛龍將左下方入網，上一隊以嚟首個入球竟然喺歐聯取得，真係可喜可賀。換邊後，紅軍靠對手後衞洛特維迪擺烏龍，領先至2:0，完場前三分鐘主隊由烏夫破蛋，紅軍仍以2:1先拔頭籌。
助紅軍贏賀芬咸2:1
阿諾特雖然冇阿諾舒華辛力加咁大隻，不過呢位「未來戰士」周二晚就肯定成為主角，入波助利記贏2:1，賽後獲選為最佳球員，佢就話好似發夢一樣；高帥亦都好風騷，話阿諾特入罰球一啲都唔意外，高路普話：「我睇過佢上季U23比賽，佢處理嘅罰球同今晚呢球同樣出色。經過一星期喺一隊練習罰球後，其實係一大挑戰，呢個入球對球隊好重要。」高帥話最緊要贏波，就算贏8:7都滿意。不過佢唔好開心住，因為右閘就話有阿諾特同基尼兩位人才，但左閘仲要用艾拔圖摩蘭奴，始終都係一大隱憂。
高帥想快閂轉會窗
阿諾特一夜成名，紅軍名宿加歷查都「借個新丁上位」；佢喺個人Twitter發文，話八年前阿諾特只不過係紅軍球僮，其中一場比賽仲由佢陪住加歷查步出晏菲路。阿諾特今晚做主角，咁一直做開紅軍主角嘅「古sir」古天奴呢？呢位巴西中場因為背傷冇份出征，留喺利物浦獨操，實際係咪因為巴塞轉會風波而被隔離就不得而知，高帥賽前就對古天奴嘅去留有啲無奈，因由控制利物浦嘅芬威體育集團決定；高帥就話𠵱家最想快啲到九月一號轉會市場關閉，佢先可以真正管理麾下球員。