時光荏苒，呢屆區議會任期又過咗近一半，新一屆區選2019年底舉行，各大陣營當然部署搶位，當中自然包括唔少屢敗屢戰嘅人士。有讀者就向八方報料，話近日路過青衣長康邨，發現盛康選區嘅民建聯區議會梁偉文周圍貼嘅海報上，除咗有民建聯新西立法會議員陳恒鑌個嘜頭，仲有一位民記小花梁嘉銘嘅樣（圖），而梁嘉銘正正就係梁偉文嘅千金，女承父業都幾呼之欲出。
由阿仔或阿女接班做區議員，過往都有出現過，唔算破天荒，不過呢位讀者心水好清，話梁嘉銘過去三屆，都係出戰葵青區嘅興芳區，挑戰民主黨嘅吳劍昇㗎，最終三戰三敗，而佢最後一仗，已經同吳劍昇得票收窄緊，如果再戰唔係必輸，唔通驚第四度敗選，唔想喺民主黨莊榮輝後變咗「區選黑妹王」，所以想輕輕鬆鬆，成功靠父幹？