可升可跌嘅點只股票價格，仲有如浮雲嘅民望呢？猶記得港大民意研究計劃上月初公佈林鄭新班子民望，未入熱廚房前因為從政而廣為市民認識嘅前民主黨員、勞福局局長羅致光（CK），以44%支持度淨值排一眾局長之首，估唔到上任「滿月」後嘅同一調查顯示，CK支持度淨值急跌20個百分點至24%，被商經局局長邱騰華以35%支持度淨值搶走榜首。
林鄭維持15%
CK唔單止冇得喺局長中做「阿一」，仲要連跌幾級排第四，排喺食衞局長陳肇始同公務員事務局局長羅智光之後，唔通同佢之前所講，較高嘅民望只係因為「食老本」？唔知IQ爆棚嘅CK，諗唔諗到點解民望急跌呢？
其實呢個喺今個月2至7日訪問817位市民嘅調查顯示，13個局長中，支持度淨值幾乎全線下跌，但推銷緊高鐵一地兩檢嘅運房局局長陳帆卻喺爭議聲中避過跌勢，支持度淨值維持喺18%，而繼續成為唯一一個負淨值局長嘅民政局劉江華，更成逆市奇葩，惟獨得佢淨值有升，但仍然以負3%喺民望榜包尾，同尾二嘅創科局局長楊偉雄嘅8%支持度淨值仍有差距。
至於特首林鄭，支持度淨值無升跌維持15%，政務司司長張建宗同財政司司長陳茂波都一樣，支持度淨值各自保持喺21%同負19%，同陳帆合力sell緊一地兩檢嘅律政司司長袁國強支持度淨值則微升一個百分比至15%。
李八方