港交所（388）前ETF推手柯江明（David Quah）過檔惠理（806）！惠理噚日公佈中期業績，提到公司成立咗「量化投資團隊」，David今年8月初加盟，擔任聯席董事總經理，同惠理老臣子麥靈佳拍住上。
柯江明喺交易所打足廿年工，做到環球市場科副總裁，有份幫手推出第一批牛熊證，任內亦力推ETF。到去年2月離開、4月份加盟韓資未來資產管理，至今一年左右就加入惠理。
呢個量化投資團隊未必似基金經理咁吸引鎂光燈，但將會係惠理其中一個大範疇，未來想發展ETF業務、大數據應用同量化產品開發，亦會開展中國、新加坡、英國業務。
惠理派Option畀員工好疏爽，造就唔少打工皇帝，但上半年向員工授出認股權開支就按年銳減72%，噚日有分析員問點解，惠理CFO王毅詩話，原因係上半年有員工離職，其認股權將視作放棄，下半年會正常番，全年預期股份基礎報酬開支大約5,000至6,000萬蚊左右。
李華華