上周五至日，天氣咁熱，但唔少政界中人都唔介意汗流浹背，企街叫咪，呼籲市民慷慨解囊，為4位被DQ嘅議員籌款。守護公義基金宣佈呢3日街站募捐同銀行存款分別各籌得逾28萬及11萬，合共約40萬，基金同4位被DQ議員都衷心感激大眾支持。
連同為咗4人喺敗訴後繳付政府律師費，基金至今籌得到約200萬，距離500萬嘅籌款目標，又近一步。
其實噚日係4位議員被撤銷議席一個月，基金話呢次DQ案除咗係以人大釋法、事後追溯方式破壞法治，亦係對全港選民嘅侮辱，「政府堅持追討訟費、立法會有意進一步追討議員薪津，令4位被DQ議員陷入破產的危機，更清楚顯示這是對民主派、對為民發聲的代議士的政治迫害」，強調基金只係希望喺民主派議員、抗爭者面對政府以無限公帑興訟纏擾時，提供法律經費支援，保障佢哋面對不義訴訟時有基本權利，合港人之力，共抗政治迫害。