【本報訊】又一間麥當勞淹沒在時代巨輪下。觀塘裕民坊麥當勞1981年盛夏開業，紅色霓虹光管襯上醒目黃M字標記，木紋地板伴着吵嚷爸媽帶他們去吃開心樂園餐的小孩成長，一代又一代小童與麥當勞姐姐開生日派對。晨光穿透玻璃窗36載，一室溫暖，坐在那張與時代脫節的轉轉凳，窗外世界物換星移，麥記恍如從未改變。這裏人稱「舊麥」，盛傳結業多年未見閉門，原來2017年是她真正的終點，據悉舊麥將於8月30日結業，人們回憶終畫上句號。
記者︰袁楚雙
觀塘街坊：兒時夢想開生日P
歌手陳康健自小在觀塘成長，在他印象中，舊麥就是個滿載溫馨的地方，「細個婆婆湊我，晨早流流落去食早餐好開心，唔知點解㗎喎！總之麥當勞就係開心啲好食啲」。以前的舊麥有蘋果樹、供小朋友坐的矮小BB凳，「蘋果樹下面就係開生日會嗰個位，細個好想開，廣告成日『荼毒』你」。廣告歌是這樣唱：時時渴望生日，做主角最開心……不過陳自言家境不算富裕沒當上生日會主角，倒是在上中學後仍然流連舊麥──以前觀塘廣場及裕民坊有大量機舖，男生們去「抄碟」後自然去舊麥「吹水」，聊到口乾更不愁糧食，只因有做兼職的朋友補給支援，「買20蚊有40蚊嘢食，成個薯條餐嚟。（舊麥）基本上好似歡樂天地咁」。
「有地方hea已經好開心」
隨着年紀漸長，陳已少光顧麥記，但舊麥的多元生態仍然令他着迷，不同人不同事都在這裏發生，「好多人做功課、溫書、拍拖，麥記拍拖我覺得都幾浪漫，以前唔需要任何嘢，有個地方你hea已經好開心」。勾起年少時的戀愛回憶和成長點滴，他不想舊麥執笠，「第一係回憶，第二係方便，以後又少一個地方坐低傾偈食嘢，之後要去好遠」。即使再開一間麥記，他相信也不是同一回事。舊麥保留溫情，新開的走向變革，他認為麥當勞也迎合時代改變推廣，無法回到以前賣溫情的日子，「香港好似冇咗以前嗰種歡笑，太天真啦，人哋唔會覺得有呢樣嘢。𠵱家個世界複雜咗，好多科技令到成個社會甚至屋企改變，正如點會覺得麥當勞係溫馨，只係去吹吓水，有啲錢寧願去間好啲嘅cafe坐」。
NGO創辦人：似非正式社區中心
活在觀塘創辦人袁智仁小時候曾短暫住過觀塘，離開再回來已經是2003年大學時期，他透露大學的初戀女友在觀塘住，差不多每日都經過觀塘舊麥，「如果尖沙嘴（等人）係五支旗杆，咁觀塘等人一定係舊麥，唔係（康寧道）新麥。呢個係觀塘街坊或者所有人嘅地標」。
「係我哋嘅流動會客室」
這個地標的威水史，是她曾經於1981年10月18日打破全球麥當勞每日最高惠顧人次紀錄，威風但不離地，舊麥價錢親民又多座位，是觀塘人重要的活動中心。袁憶述創辦活在觀塘專頁，不時會與義工們約在舊麥開會，「我哋呢啲冇乜錢嘅NGO，一定約喺麥當勞開會，麥當勞係我哋嘅流動會客室，見記者、見街坊都一定喺麥記」。少男少女在此聊天、打遊戲對決、補習，長者坐在舊麥攤開棋盤對弈，「呢度某程度係觀塘街坊嘅公共空間，一個非正式的嘅社區中心」。
80、90年代的裕民坊發展繁華，仁愛圍附近的CD店據聞連歌手黃耀明也去尋寶，街上有不同走鬼檔、大排檔，大腸、海鮮草根美食齊全，還有兩所戲院，加上有麥當勞，社區充滿活力，「自給自足，好似觀塘人嘅尖沙嘴咁」。
重建項目將觀塘活力打沉，地標一個個在地圖上消失，袁對舊麥的結束感到傷心，「當最後嘅地標都冇，呢度就好似變成零。觀塘兩個字就只係地鐵站名，入面冇晒歷史，如果有下一代問當年我哋喺邊度等人，連呢啲痕迹都冇，係非常之失落」。他形容僅餘的舊麥已不只是集體回憶，24小時開放為裕民坊的烏燈黑火點一盞明燈，「將來呢度冇嘢食、冇補給，變晒死城，地方好黑會有治安問題，麥記結業不只回憶問題，仲衍生重建過渡中間治安安排，係點樣呢？街坊需要公共空間，政府規劃可唔可以做得好啲？」
跟大隊「遷徙」 麥難民：都知佢就拆
午夜一時環顧舊麥，各個角落、長椅上瑟縮了一個個借宿的麥難民，另一邊廂年輕人結群消夜，偌大空間只餘下他們的嬉笑聲與高分貝背景音樂。
坐在角落的Ben說，每逢午夜這裏的音樂特別大聲，加上年輕人的放肆，「好嘈，（背景音樂）12點後特登開大聲啲」。尋一絲安寧就要用上耳塞，他見過有宿者忍受不了太吵的年輕人阻礙睡眠，「嗌佢哋『咪嘈呀』」。
Ben家住舊樓天台屋，但獨居生活太悶，任職清潔的他每逢收工就來舊麥坐坐，只因有冷氣兼無蚊，順便見見打躉的老朋友，「傾吓馬仔，賭波，鹹鹹濕濕嗰啲嘢，呢度幾乎全部都係男人嘛」。在這裏睡覺有潛規矩嗎？「冇，早嚟早霸位。唔好太早瞓，太早經理會拍醒你」。
找散工聚腳地
有時他會去其他麥記看看，憶述前年坪石邨麥當勞有麥難民死去，那邊晚上從此封起肇事位置不讓人借宿，「貪得意走去睇吓啫，我都唔去嗰邊」。最終還是流連舊麥，Ben戲言麥記是「麥當勞大酒店」，「個個都可以嚟過夜，幾好呀，夏天又有冷氣歎，最緊要冇蚊」。日間見到市民在玻璃房內開生日會，見過有怪人婆婆呃年輕人請食薯條，夜晚還遇到會介紹散工的同路人。
黃伯撐着自製柺杖一拐一拐在餐廳走動，不時轉位找個最舒適的位置。他住玉蓮臺，但與鄰里關係不和，家中中層對正地鐵站無風，夏天翳焗就來舊麥，「好多晚都嚟，有冷氣嘛，屋企住嗰度冇冷氣，二嚟啲鄰居唔係幾好」。無兒無女無家人，索性來「瞌眼瞓」，他也去過附近地庫麥記，但嫌環境骯髒，不及舊麥乾淨。
談到舊麥結業，這些寄居者不約而同指無太大感覺，黃伯說「冇乜所謂啫，去茶餐廳坐好過」。Ben指屆時會「跟大隊」隨熟悉的老友記一同遷徙去其他分店。在社會底層掙扎求存，談集體回憶似乎太奢侈，「冇話唔捨得，都知佢就拆㗎啦，十幾年前已經話要重建，啲嘢係咁啦。重建好都唔關你事，啲樓咁貴」。